Tag Archives: Njala

Leeupoort: Die Bos Praat met Jou

Die bos vertel vir jou sy storie en al wat jy moet doen is om net te luister. Die kinders kan op hul eie deur die reservaat op Leeupoort Vakansiedorp fiets ry.

Die stilte bring `n rustigheid in jou wat jy nie met geld kan koop nie. Jy moet net nie jou selfoon die hele tyd aanhou nie want die Whatsupp en ander oproepe lei jou aandag af en neem jou terug na jou kantoor of werksplek.

 

Jy kan vir `n lang tyd geen oproepe kry nie maar sodra jy buite langs die vuur bybelstudie wil hou kry jy die meeste onnodige oproepe asof die duiwel dit so beplan. Ek en Jan du Preez het een oggend 9 uur beplan om bybelstudie te hou by Ifafa732 op Leeupoort waar ons die akkommodasie terdee geniet. Voor die tyd het ons twee geen selfoonoproepe gekry nie en net toe ons begin kry ons oproepe Jan drie en ek een. Nou wat vertel dit vir jou!!

Daar waar jy rustig buite sit kom die vlakvarke gewoonlik eerste daar snuffel vir kos. Wees net versigtig vir hulle en kyk net na daardie gevaarlike tande waarmee hulle jou kan kap. Die njalas en bosbokke maak ook hul draai. Die koedoes en elande kom nie gereeld kuier nie. Die grysbekneushoringvoels laat ook gereeld van hulle hoor en besoek ook redelik gereeld die broeikas wat aan een van die bome staangemaak is. Dis reeds nou broeityd waar die wyfie in die kas toegemessel is met `n klein oop gleufie waardeur die mannetjie haar voer.

Lekker rustige dag vir jou.

Leeupoort: Ribbetjie Braai

Wat is nou lekkerder as ribbetjie braai op Leeupoort waar jy die laaste lawaai van die fisante aanhoor wat besig is om in die bome hier by jou hul tuis te maak vir die nag.

Terwyl die vuur knetter om kole te maak kom loer die njalabul om te kyk of hy nie iets te ete van jou kan kry nie. Die sekelboshout neem `n rukkie om kole te maak en intussen sit jy met jou voete op die rand van die es want dit is altyd baie lekker om met jou voete omhoog te sit want dan ontspan jy maklik en heerlik.

 

Wat `n rustigheid!

Terwyl die hout transformer na kole kan julle nie anders as om die springbokspan te be-oordeel nie want ons is mos almal `n deskundige want die afrigters is mos amateurs. Die manne raak so weggevoer met die spankeuse dat almal die afrigter net more sal wil gaan afslag. Die vrouens doen navraag oor “ wanneer is die vleis gereed” en dit bring die manne genadiglik terug na die werkilkheid.

Die rustigheid keer terug na normaal, die vleis word op die kole geplaas, en die manne bepeins die kole terwyl die twee bosvarke so 5 meter van hulle af doodstil staan en wag vir die afval beentjies.

 

Spesiale Njalabul op Leeupoort Vakansiedorp

Rooi Njalai-bul

SPESIALE ROOI NJALABUL – Die Njala-bul en Njala-ooi se kleur en hul grootte verskil. Onder die kleiner wildsoorte word manlike diere “ramme” en vroulike diere “ooie” genoem; terwyl “bulle” en “koeie” vir groter wildsoorte gebruik word om die diere se geslag aan te dui. Die njala is die middel van de twee groepe. Daar word na die manlike dier as ‘n “bul” verwys, omdat hy heelwat groter is as die vroulike dier, wat ‘n “ooi” genoem word.